مصر ام الدنيا ليه؟؟؟؟؟؟؟؟؟

من طرف sniper الإثنين 22 فبراير 2010, 3:34 pm

فيه سؤال من زمان فى دماغى بيلح عليا بس مش عارف اساله لمين؟ ولو سالته حلاقى اجابه ولا لأ ..من زمان الحكايه دى ولكنه بدا يضغط على زهنى ويورقنى فى الفترة الاخيرة

لكن من يومين وانا قاعد مع اختى فى ساعة صفا فوجئت بي اسالها
هى ليه مصر ام الدنيا؟ عشان ايه يعنى مصر ام الدنيا؟

سكتت اختى شوية وبعدين قالت بيقولوا عشان الحضاره اللى بقالها 7000 سنه
سمعتها وسكت ومتكلمتش ورجعت افكر تانى
من زماااان من ايام ماكنا عيال بنسمع شادية بتغنى الاغنيه المشهوره
هى ام الدنيا مصر..هى وردة كل عصر
لكن اللى بساله ...ليه ...ليه مصر ام الدنيا؟ عايز اعرف الاسباب
هل فعلا زى ما قالت اختى عشان الحضاره اللى انشات من 7000 سنه؟؟ طب واحنا عملنا ايه بعد ال 7000 سنه دول عشان نفتخر بيه
لو خدتوا بالكم شويه احنا بنقول حضارة انشأت من 7000 سنه ..يعنى بنفخر بالمصريين القدماء اللى عملوها من 7000 سنه...طب والناس اللى جت بعد كده..ايه مصيرهم حصلهم ايه؟؟ياترى فهمتوا قصدى؟؟ يعنى عدى على مصر 7000 سنه عاش فيها ناس وماتوا واندثروا ولم يعرف عنهم التاريخ شيئا ولم يعرف عنهم المصريين نفسهم حاجه...واتعودنا على كده منعملش حاجه ونتلزق فى اللى عملوه اللى قبلنا خلاص بقت دى سمة المصريين...
معلش طولت فى الحكايه دى بس مش ده اصلا الموضوع نرجع للسؤال

ليييييه مصر ام الدنيا حد يجاوبنى
عشان النيل؟؟؟ طب مهى العراق فيها نهرين والاردن فيها نهر وامريكا فيها انهاااااااااار كتيره محدش قال على امريكا ليه ام الدنيا؟
ولا مره سمعنا شاديه امركانيه بتغنى هى ام الدنيا امريكا او الاردن او ..او...او
كل ماحد يتكلم عن مصر يقولك النيل والاهرامات طب ايه تانى ...
ناسها الطيبين.المزلولين..المطحونين وفى المواصلات متكربسين
السؤال ده دايما بيجى على بالى كتيييير

هى ليه مصر ام الدنيا؟
بيجى لما بشوف راجل عجوز شادد عربيه كارو صغيره عليها شوية خس او جرجير اوشوية تين شوكى اخر النهار منهك من ومش لاقى حد يشد معاه..مش العربيه انا اقصد يشد معاه همه
بيجى لما بشوف امرأه عجوز مسنه تتسول فى الاشارات لا تجد من يعولها او من يضمن لها عيشه كريمه (اقصد ولا مؤاخذ التكافل الاجتماعى – معلش هو لفظ اصبح عيب اليومين دول بس محدش يزعل منى)
بيجى لما بلاقى طفل مشرد نايم جنب اى صندوق قمامة او تحت كوبرى
بيجى لما بلاقى الشعب راكب اتوبيس ومدلدل من الباب عشان يروح شغله اللى اصلا يادوب ياكله عيش وشوية فول
بيجى لما بشوف طواااااابير الشباب على اى مصلحة (بيقولوا) بيقولوا انهم عايزين تعيينات وياعينى يصوروا يقدموا الاوراق المطلوبه وبعدين ستك عند خالتك عشان اصلا الاعلان ده معمول عشان المصلحة حتعين حبة ناس عندهم اصلا ومعاهم اساميهم بس لان القانون بيقول مفيش تعيين بدون اعلان فى جريده رسميه

مصر ام الدنيا ليه
عشان معدش اى ورق حكومى ماشى بدون اكراميات(اصل كلمة رشوه اتلغت من القاموس اللغوى)
ولا عشان الناس معدتش بتلاقى حقها الا لو صوتها على وعملت شغب(قديما كانوا بيسموها مظاهرات). اللى عايز الميه ترجع له يتظاهر وتيجى الصحافه والتليفويون يصوروا والغريبه ان المشكله غاليا ما تتحل طب كنتوا فين يا مصريين يا مسؤولين يا ابناء ام الدنيا من زمان ولا لازم نعريكم ادام الناس..واللى يغيظ ان المسئول يطلع يقول كله تحت التحكم وماشيين فى حل المساله وكلها 10 ايام والميه ترجع او الرشاح يتغطى او الكهربه تتصلح او اللى اتشردوا حنسكنهم
طب اشمعنه 10 ايام؟؟؟اعتقد على ما الجمهور اللى شاف المأساه ينسى الموضوع ويكونوا لقيوا مأساه جديده تلهيهم (وهلم جرا)
برده مصر ام الدنيا لييييه
عشان عسكرى المرور واقف اللى يلاقيه واقف صف تانى ويديله حاجة اسف اقصد اكراميه يقوله بغضب مصطنع(شهل شويه عشان الطريق) واللى ميدفعش ياخده مخالفه؟؟
عشان التامين الصحى اللى حيتباع والغلبان العيان يرزع دماغه فى اتخن حيط(يمكن دماغه تخف وتتحل؟)
طب ولما يتباع زى كوووول المصالح والشركات اللى اتخصخصت ياترى فلوسها بتروح فين؟؟السؤال ده بالذات تقريبا من صعوبة حله لغوه من كل المقررات الاخباريه والحوارية والدستوريه والبرلمانيه والحزبيه وحتى الملوخيه بالتقليه

مصر ام الدنيا ليه؟؟
ياترى الدنيا اللى فيها امريكا بسطوتها واروروبا بتقدمها وشرق اسيا بتفانيهم والصين واللى عملوه والمانيا اللى قامت بعد الحروب العالميه وبقت من الدول العظيمه فيما لا يتعدى 60 سنه وماليزيا والطفره الاقتصاديه والانجاز اللى حققوه فى 25 سنه
ياترى الدنيا اللى فيها كوووول الدول دى برده لسه مصر هى امها؟؟؟؟

من طرف sniper الأربعاء 24 فبراير 2010, 12:43 pm

محدش رد عليا : ليه مصر ام الدنياااااااااااااااااااااااااااااااااااااااااااا
ا مصر ام الدنيا ليه؟؟؟؟؟؟؟؟؟ 36207_1178184040

من طرف كارلوس الأربعاء 24 فبراير 2010, 5:42 pm

علشان محمد منير قال يا مصر يا ام الدنيا يا اغلى الاوطان

من طرف sniper الثلاثاء 20 أبريل 2010, 8:19 am

برده مصر ام الدنيا لييييه

من طرف شيماء/شوشو الإثنين 03 مايو 2010, 10:28 pm

لا انا اقولك ام الدنيا ليه يا احمد
اولا مصر كبيرة بشعبها مش بمشاكلها يا احمد
كمان انا مستغربة جدا جدا بجد ان كل الكلام بيكون عن مشكلات البلد
اوك انا معاك ان في مشاكل
بس اقولك ليه ام الدنيا
عشان في وسط البلد الي مليانة مشاكل دي فيها شعب قادر يستحمل كل دا
اقولك ليه ام الدنيا
عشان شعب مصر دا يمكن بيحاول يطبق صفات المؤمن
في كل موقف بيقول الحمد لله
يمكن عشان كدا ربنا مخلينا مستحملين كل دا
مصر كبيرة بتاريخ زي ما بتقول 7000 سنة
و كبيرة بحاضر الشباب الي جزء و لو صغير منها بيحاول يعمل حاجة للبلد دي
بمستقبل كلنا انا و انت و كل الناس بتحلم بيه يكون احسن
مصر قلعة اتبنت من تاريخ و تفكير و كفاح شعب من ايام احتلال البلد لغاية النهاردة
مصر كبيرة لان عندها خير جنود الارض
مصر ام الدنيا عشان اتذكرت في القرأن
مصر كبيرة و ام الدنيا لان عندها جيش و شعب قدر يقف قدام كل احتلال علي مر العصور سواء اسرائيلي انجليزي بريطاني و فرنسي و كل تقريبا مستعمر دخل مصر
و لو مصر مش ام الدنيا و كبيرة و عالية بشعبها و جيشها و اخلاص ولادها الي بيحبوها بجد مش هتتغلب علي الي فيه
مصر ام الدنيا لانها البلد الي بتستقبل كل يوم سياح من جميع بلاد العالم و مش في حد من الناس دي خرج بيكره مصر لاننا بلد اكرمناه كويس و عرفناه معني يعني ايه اقول انا مصري
يعني واحد جدع و يعرف ربنا
مصر كبيرة بفنها الي بتقدمه مصر قلعة الفن في الوطن العربي
مصر هوليود الشرق
مش عارفة انت حاسس بدا و لا لا بس انا شايفة ان علي قد ما في مشاكل في حاجات كويسة جدا
في ناس مش كويسة بس في ناس لسة عايزة تعمل حاجة للبلد
عرفت ليه مصر ام الدنيا
عشان هي عالية فعلا
سوري علي الاطالة
و مرسي للموضوع

من طرف sniper الثلاثاء 04 مايو 2010, 11:20 am

طبعاً يا شيماء انا باحترم رأي حضرتك بس هو ليه لازم يكون فيه مشاكل
ليه الأطفال بتتشرد في الشوارع ؟
ليه الناس مش لاقية تاكل ؟
ليه الشباب مش لاقي شغل ؟
هاتقوليلي نجمع من كل مصري جنيه كل شهر ويكون معانا 80 مليون جنيه
ونبني مصانع ونشغل الشباب ..... مين اللي هايسيبك تعملي كده
لما الحكومة تسيبك تعملي كده هاتسترزق منين الحكومة
بالنسبة للحضارة والسياحة وقناة السويس الشعب بستفيد من الحاجات دي بإيه
الناس زي ما قولت مش لاقية تاكل .......!!!!
كفاية كده وربنا يسترها عليا

من طرف ظلاوووى الثلاثاء 04 مايو 2010, 4:39 pm

طيب يا شمياء اكتب انا اية بقى

وعايز تعرف مصر لية ام الدنيا يا سنيبر

علشان فرنسا ام اللمبى

لا بجد علشان كل حاجة فيها حلوة

ارضها اهلها جوها

مشاكلها احوالها علاقاتها

سياستها مساحتها طبيعيتها

كل حاجة فيها انا عاشقها

كل حاجة فيها انا حاببها

علشان كدة مصر ام الدنيا

وهى عندى لوحدها دنيا

ومهما يحصل فيها انا بردة حاببها

ظلاوووى

من طرف دعاء الثلاثاء 04 مايو 2010, 4:46 pm

قولتها بنفسك يا سنيبر كل المشاكل اللى فيها دى مش بسببها دى بسبب بعض العناصر السيئة فى حكومتها بس لكن هى فعلا ام الدنيا لكل الاسباب اللى شيماء ئلتها دى

من طرف شيماء/شوشو الثلاثاء 04 مايو 2010, 8:13 pm

اكتب اسمي صح يا ظلاوي

و يا احمد بردو الكلام الي انت قلته دا مش مقتنعة بيه لسبب واحد
هو انت عايز الحياة دي تمشي تمام و من غير مشاكل يعني
مستحيل
فيها ايه يعني اما نكون بلد كويسة جدا بس في مشاكل فيها
قولي بلد واحدة مش فيها مشاكل
هتقولي اصل دول عندهم احسن
و دا عنده احسن
منين تعرف ان الناس دي عايشة مرتاحة
يعني بتفكر ازاي يا احمد
زعلان اوي ان في مشاكل في البلد ما انت لو طول عمرك بصيت علي مشاكل البلد ابقي قابلني لو نجحت في حاجة
بص يا احمد بلاش تبص علي الي مش في ايدك و تقول اشمعنا دا مش عندي
لا بص علي الي معاك و قول الحمد لله عليه
و المشاكل مش عارفة ازاي بتقولي عشان انا مش فاهمة حاجة بقول كدا
يعني بجد مش عارفة و اول مرة اشوف حد مش بيفكر غير في المشاكل الموجودة و بس
عايز تفهمني ان البلد دي مش كويسة خالص خالص في نظرك يعني
تعرف لو كنت في الجوالة كنت هقولك بتقدر تحيي علك بلدك و انت حاسس بالي جواك دا
بلاش الجوالة
عمرك ما حييت العلم يا احمد
هقولك علي مثال بسيط جدا
النهاردة كان في طابور عرض ووقفنا لما اتبهدلنا
لكن تعالي شوف شكل الناس و هي بتحيي العلم
بتقول تحيا جمهورية مصر العربية ازاي
تعالي شوف حد من الجوالة وراجع من رحلة خلوية بهدلة و عنده تقرير عايز يخلصه و تخييم و طهي خلوي
و مع ذلك تعالي و انت خارج لسة الصبح بتحيي العلم ازاي
ووانت متبهدل كدا ووراك مليون حاجة بتقول
تحيا جمهورية مصر العربية ازاي
بتقولها و انت حاسس بانك مصري فخور بالكلمة دي
مش بتقولها تأدية واجب
بص يا احمد بعد مناقشة كبيرة بيني و بينك بجد ليك افكار غريبة مش شايف غيرزي ما الناس بتقول
النص الفاضي لكن عمرك ما شوفت النص المليان
فكر تاني يا احمد و راجع تاريخ بلدك وشوف حاضر بلدك الي بيتجدد حواليك و انت مغمض عينك عنه عشان مش عايز تشوفه و لا تعترف بيه
فكر في مستقبل بلدك الي هيكون احسن بكتير لو شلت كل الافكار دي من دماغك و فكرت انت و غيرك تخدم البلد دي بجد و تتعامل معاها علي انها بلدك
الي انت فخور انك منها و حاسس فعلا لما تقول انا مصري يعني انا عالي بكل حاجة
و نصيحة مني حاول يكون عندك شوية انتماء
يمكن انتمائي لبلدي كبير بس بجد الجوالة ليها فضل كبير مع اني جديدة اهه بردو لسة يعني
بس فعلا ليها فضل كبير انها تحسسني اني اكون فخوة باني مصرية
فميرسي كتير للجوالة
مش لاقية كلام تاني اقوله لاني عارفة مهما قلت مش هتقتنع
بس عيد كلامنا كلها كدا و اقراه بتمعن و انزل شوف بلدك كدا
عمر ما كان ليك زكريات كويسة تفتكر بيها بلدك ابدا
مش مصدقة

سوري تاني يا جماعة عارفة اني طولت بس معلش
استحملوني شوية

من طرف صاحب الظل الثلاثاء 04 مايو 2010, 8:19 pm

مصر ام الدنيا

عشان اانا فيها

مصر ام الدنيا ليه؟؟؟؟؟؟؟؟؟ Lol

عشان شعب اصيب
عشان احنا جنود الله في الارض
عشان بناكل فووووووووووووووول يا عمونا
ههههههههههههههههههههههههه

من طرف صاحب الظل الثلاثاء 04 مايو 2010, 8:19 pm

مصر ام الدنيا

عشان اانا فيها

مصر ام الدنيا ليه؟؟؟؟؟؟؟؟؟ Lol

عشان شعب اصيب
عشان احنا جنود الله في الارض
عشان بناكل فووووووووووووووول يا عمونا
ههههههههههههههههههههههههه

من طرف كارلوس الثلاثاء 04 مايو 2010, 9:53 pm

وحماقى قال
ام الدنيا مين ولا فى زيها فين بلدى فى حباب العين
بس كدة

من طرف sniper الأربعاء 05 مايو 2010, 6:56 am

كلام كويس وجميل
وطبعا الواحد لما بييجي يحيي العلم او لما يسمع ماتش مصر وأي دوله تانية ونسمع السلام الوطني
طبعاً الواحد بيحس بعظمة البلد
بس انا بسأل ليه مع عظمة البلد دي أهلها يعملوا كده في بعض
وحكومتها ليه تعمل كده في اهلها ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
لييه مانعيش في استقرار داخلي ؟؟؟؟؟؟؟؟؟؟؟؟؟؟؟؟؟؟

من طرف شيماء/شوشو الأربعاء 05 مايو 2010, 11:33 am

عشان هي دي الدنيا يا احمد
فيها الكويس و فيها الوحش
فيها الخير و فيها الشر
و التناقض دا طول ما البشرية عايشة هيفضل موجود
مش بقولك لازم تبص الاول علي الي في ايدك و تقول الحمد لله
و ربنا هيبعد عنك الشر الي انت معتقد انه بقي مش موجود غيره دلوقتي
لان بجد في خير و في شر
في ظلم و في عدل
مش طول عمرك هتعيش كويس و مش طول عمرك هتعيش مظلوم
هي الدنيا كدا
بلاش تطمع في ان يكون ليك السعادة كلها
لا قول الحمد لله اني خدت شوية سعادة و استقرار
و الحمد لله علي المشاكل الموجودة الي ان شاء الله هتتحل من عند ربنا و بردو هحصل علي اكبر قدر من السعادة
كمان يا احمد الاول قبل ما تدور علي استقرار في كل شئ في البلد
دور علي استقرارك انت الداخلي
لما ترضي بالي ربنا كتبهولك و تقول الحمد لله و هحاول اصلح
و لو كل واحد عمل كدا
هتبقي بلدنا احسن و اعظم بلد في العالم

if you wanna make aworld abetter place
take alook at your self and make change
start with the man in the mirror ahmed
you `ll reach the truth

من طرف halim الأربعاء 05 مايو 2010, 1:21 pm

اعتدقد ان مفيش كلام اقوله بعد كل الكلام ده
غير ان مصر ام الدنيا باحساس اهلها بيها
مصر ام الدنيا علشان مهما عملنا في بعض
ومهما اختلفنا ومهما اتخانقنا
مبنسمحش لحد يتدخل بينا
بنقطع بعض ونرجع نتصالح تاني
علشان احنا في الاصل بنحب بعض